I etterkant av at Årbok Høyanger 2024 kom i trykken, har årboknemnda fått inn ny informasjon til artikkelen Til Sverige, «förr at eta opp sig».
I årboka står det at ei av dei som følgde «svenskebarna» frå Høyanger var Borghild Kjos. Det var ikkje ho, men søstera Claudia Kjos.
Claudia blei hyra til denne turen kort tid før avreise fordi ho som skulle følgje med, var blitt sjuk. Denne dama var frå Hafslo. Claudia meiner å hugse at ho hadde etternamn Grøtting. Claudia fortel at ho var med på denne reisa fram til Flåm. Då dei kom dit, dukka Grøtting opp og følgde med på reisa til Sverige. Claudia måtte returnere til Høyanger, men det skjedde først etter tre- fire dagar. Ho blei verande i Flåm, og måtte bu på hotell før retur. Claudia var 19 år i 1945, (f. 4.mai 1926), og er i 2024 98 år.
Vi har og fått informasjon om at borna frå Høyanger ikkje var dei einaste frå Sogn og Fjordane. Det var og 5-6 born frå Svelgen som blei sende til Sverige i 1945. I Svelgen var det Sanitetskvinnene som organiserte turen. Dei for via Bergen, fekk vaksine og legeundersøking på Florida-sjukehuset i Bergen før dei drog derfrå. Dei var visst også i Boråstraktene. Dei kom heim att medio mars 1946.
Vi har og fått ny informasjon om identifisering på nokre av dei som er med på bileta frå avreisa. Her er dei korrigerte bilettekstane.
Barn med følgje klar for avreise frå Høyanger til Sverige tidleg i oktober 1945. Følgjedamene bak frå venstre er Magnhild Bremer Kjos, Margrethe Vangen og Claudia Kjos. Nokre barn er vanskeleg å identifisere heilt sikkert, og er markerte med «?».
Frå venstre i fremste rekke: Eldbjørg Østerbø, Mona Ytredal, Hugo Ytredal, Kåre Øyre, Olav Folke Kornberg, Tore Finnebotten? og Erling Vangsnes?. Bak mellom Magnhild Bremer Kjos og Margrethe Vangen står Egil Høyvik og framfor han Signe Sande. Guten framfor Margrethe Vangen, er Jørgen Tufte og framfor han, Arne Høvik? Jenta framfor og delvis skjult, er Heidi Nordgren? Bak høgre skulder til Tore Finnebotten? står Sverre Finnebotten og Åge Finseth bak han. Laila Løland står framom Claudia Kjos. Bak Erling Vangsnes står Evelyn Øyre? og Inge Burøy bak ho. Heilt til høgre står Astrid Christiansen og bak henne, Robert Indrebø. (Foto: Lars Kornberg/Privat eige)
Som det går fram av biletteksten er fleire av namna markert med «?» , dette fordi identiteten er noko usikker. Det er fint om nokon kan gi tilbakemelding til oss for bekrefte eller eventuelt avkrefte namn til post@hoyangerhistorielag.no.
Lars Kornberg har fotografert sonen Olav og ein anna medreisande gut ved avreisa i Høyanger til Sverige tidleg i oktober 1945. Olav Folke Kornberg til høgre og Hugo Ytredal til venstre. Dei verkar avslappa og reiseklare. (Lars Kornberg/Privat eige)